काठमाडौं । प्रधानमन्त्री केपी शर्मा ओलीले भगवान राम र अयोध्याका विषयमा हिजो दिएको अभिव्यक्तिको चौतर्फ आलोचना भइरहेका बेला परराष्ट्र मन्त्रालयले प्रधानमन्त्रीको अभिव्यक्तिप्रति स्पष्टिकरण दिएको छ ।
मन्त्रालयले सोमबार एक विज्ञप्ति जारी गर्दै प्रधानमन्त्रीको अभिव्यक्ति राजनीतिक विषयसँग नजोडिएको स्पष्ट पारेको छ । विज्ञप्तिमा भनिएको छ, ‘प्रधानमन्त्रीको अभिव्यक्ति राजनीतिक विषयसँग जोडिएको छैन र कसैको भावनामा चोट पुर्याउने आशयको पनि होइन ।’
प्रधानमन्त्री ओलीले आइतबार भगवान राम भारतीय नभएको र असली अयोध्या वीरगञ्ज नजिकै ठोरीमा पर्ने दाबी गरेका थिए । उनले भारतले नेपालमाथि साँस्कृतिक हस्तक्षेप गरेको बताएका थिए ।
अहिले प्रधानमन्त्रीको अभिव्यक्ति अप्रमाणित भएको भन्दै विभिन्न व्यक्ति र क्षेत्रबाट आलोचना भइरहेको छ । प्रधानमन्त्रीको अभिव्यक्ति सत्तारुढ नेकपाकै शीर्ष नेताहरुले गलत भएको भन्दै आत्मालोचना गर्न आग्रह गरेका छन् ।
