धादिङ। धादिङ र चितवनको सिमानामा रहेको मौवाखोला पुलको सँगै भत्किएको सडक ग्याबिन जाली भरेर मर्मत गरिने भएको छ । डिभिजन सडक कार्यालय भरतपुरका प्रमुख कृष्ण अधिकारीले बाढीले भत्काएको भागमा नेपाली सेनाको सहयोगमा ग्याबिन जाली भरेर सडक सञ्चालन गरिने बताए ।
मौवाखोलाको पुल र सडक जोड्ने १२ मिटर भाग सोमबारको बाढीले बगाइदिएको छ । डिभिजन प्रमुख अधिकारीले बेलिब्रिज बनाउने वा ग्याबिन भर्ने भन्नेबारे विभागमा छलफल भए पनि तत्कालका लागि छिटो सवारी सञ्चालन गर्न ग्याबिन जाली प्रभावकारी हुने बताएका छन् ।
उनले यसका लागि नुवाकोटबाट जाली मगाइएको छ । सडक सञ्चालन गर्न पानी रोकिएर लगातार काम गर्न पाए दुई दिनमा सडक मर्मत गरिसक्ने अधिकारीको भनाइ छ ।
