काठमाण्डौँ । विवेकशिल नेपाली दलले ई-कमर्स तथा अनलाइन डेलिभरी सेवालाई गरी खान दिन अनुरोध गरेको छ । एक विज्ञप्ती जारी गर्दै सो दलले ई-कमर्स तथा अनलाइन डेलिभरी सेवा सञ्चालकहरूले निषेधाज्ञाको बेलामा डेलिभरी सेवा सुचारु गर्दै गरेको विषय राम्रो भएको भन्दै खाद्य तथा अन्य आवश्यक उपभोग्य सामानहरू डेलिभरी हुँदा आम नागरिकहरुलाई सहज भएकोमा यो कार्य रोक्नु राम्रो नभएको बताएको छ ।
दलका उपाध्यक्ष अजीता राईद्धारा हस्ताक्षर गरिएको विज्ञप्तीमा काठमाडौँका विभिन्न स्थानहरूबाट ई-कमर्स तथा अनलाइन डेलिभरी सेवा उद्यमीहरू, डेलिभरी गर्ने व्यक्तिहरू विना पक्राउ पुर्जी पक्राउ गर्ने र सवारी साधन नियन्त्रण लिने कार्य गृह मन्त्रालय अन्तर्गतका निकायहरूको मौखिक आदेशमा नेपाल प्रहरीबाट भएको भन्ने खबर प्रति विवेकशील नेपाली दलको ध्यानाकर्षण भएको जनाईएको छ ।
सङ्क्रमणबाट जोगिन आवश्यक पर्ने सबैजसो मापदण्ड पूरा गर्दै महामारीमा सर्वसाधारणलाई सिर्जनशील तवरबाट सेवा सञ्चालन, र महामारीका बखत धेर-थोर रोजगारी सिर्जना गरिरहेका ई-कमर्स तथा अनलाइन डेलिभरी सेवालाई निरुत्साहित गर्ने कार्य कुनै सरकारी निकायबाट हुनु नहुने दलले जनाएको छ । विवेकशील नेपाली दलले ई-कमर्स तथा अनलाइन डेलिभरी सेवालाई गरी खाने वातावरण सिर्जना गर्न सम्बन्धित निकायसँग माग गरेको छ ।
