मलेखु । फुर्केखोला–धादिङबेंसी सडकको पहिरोबाट ट्याक्सी खस्दा एक जनाको मृत्यु भएको छ । काठमाडौंबाट सुत्केरीलाई लिएर बिहीबार साँझ धादिङबेंसीतर्फ जाँदै गरेको ट्याक्सी कालुपाण्डे मार्गको सिद्धलेक–६ तिरतिरेधारा नजिकैको पहिरोबाट खस्दा सुत्केरीका आफन्त गंगाजमुना–३ की ५० वर्षीया बिन्दु तामाङको मृत्यु भएको हो । दुर्घटनामा सुत्केरीसहित अन्य ४ जना घाइते भएका छन् ।
इलाका प्रहरी कार्यालय गजुरीका डीएसपी विश्वराज खड्काले बा१ज १२६२ नम्बरको ट्याक्सी अन्दाजी १ सय ५० मिटर तल खसेर थोपलखोला खेतमा पुगेको बताएका छन् । उक्त स्थानमा गत साउन ५ को अविरल वर्षाले पहिरो गएको थियो । एकतर्फि रुपमा सञ्चालन भैरहेको उक्त जोखिमपूर्ण स्थानमा पहिरो छिचोलेर सवारी चल्ने गरेका छन् ।
