धादिङ । धादिङमा पछिल्लो २४ घण्टामा थप २७ जनामा कोरोना पुष्टि भएको छ । थपिएका संक्रमितहरु धादिङको गल्छी गाउँपालिकाका ८ जना, त्रिपुरासुन्दरी गाउँपालिकाका ७ जना, धादिङ अस्पतालका ४ जना, नीलकण्ठ नगरपालिकाका ३ जना रहेको स्वास्थ्य कार्यलय धादिङका हेल्थ असिस्टेन्ट मिलन रिजालले जानकारी दिनुभयो ।
यस्तै नेत्रावती डवजोङ गाउँपालिकाका २ जना, धुनिबेशी नगरपालिकाका १ जना, बेनिघाट रोराङका १ जना, गजुरीका १ जना रहेका छन्। मंगलबार थपिएका संक्रमितहरुमा १४ बर्षदेखी ७५ बर्ष उमेर समुहका ४ जना महिला र २२ जना पुरुष रहेका छन् । यससँगै जिल्लाभर जम्मा संक्रमितको सङ्ख्या १ हजार १ सय ७५ पुगेको छ ।
निको हुनेको कुल सङ्ख्या ८ सय ७१ पुगेको हेल्थ असिस्टेन्ट रिजालले बताउनुभयो । यस्तै जिल्लामा अहिले सक्रिय केशको सङ्ख्या २ सय ८३ जना रहेका छन् । धादिङमा कोरोना संक्रमणबाट ज्यान गुमाउनेको सङ्ख्या १३ पुगेको छ ।
