धादिङ । प्युठानबाट बिरामी बोकेर काठमाडौं जाँदै गरेको पिकअप भ्यान त्रिशुली नदीमा खस्दा बेपत्ता भएकामध्ये २ जनाको शव भेटिएको छ । ३ जना बेपत्ता भएकामा २ जनाको शव भेटिएको प्रहरीले जनाएको छ । चालक सुर्य के सी र भ्यानमा सवार जमुना रोक्काको शव भ्यानभित्रैबाट निकालिएको उद्धारमा खटिएको प्रहरीले जनाएको छ ।
आज बिहान साढे ५ बजे लु १ च ९७३१ नम्बरको पिकअप भ्यान चितवनको इच्छाकामना गाउँपालिका वडा नम्बर ४ स्थित नागदी खोला भन्ने स्थानबाट त्रिशुलीमा खसेको थियो । सडकबाट करिब ६० मिटर तल त्रिशुली नदीमा खस्दा ३ जना बेपत्ता भएका हुन् । अझै एक जना बेपत्ता रहेको र उनको खोजी भइरहेको प्रहरीले जनाएको छ । पिकअपमा सवार चारमध्ये एक जना घाइते भएका छन् । उनलाई उपचारका लागि भरतपुर अस्पताल पठाइएको छ ।
