धादिङ । नेपालमा कोरोना संक्रमितको संख्या दुई लाख २९ हजार ३ सय ४३ पुगेको छ । आज देशभर बिभिन्न स्थानमा गरिएको परीक्षणमा थप १७ सय ३ जनामा कोरोना संक्रमण पुष्टि भएको स्वास्थ्य तथा जनसङ्ख्या मन्त्रालयले उल्लेख गरेको छ ।
हिजो बिहिबार १६ सय १४ जनामा कोरोना भाइरसको संक्रमण पुष्टि भएको थियो । सङ्क्रमितमध्ये पछिल्लो अपडेट अनुसार २४ घण्टा भित्र १ हजार २ सय ३६ जना डिस्चार्ज भएसँगै दुई लाख १० हजार ६ सय ७१ जना संक्रमित निको भएर घर फर्किएका छन् ।
अहिले देशभर १७ हजार २ सय ३७ सक्रिय संक्रमित रहेको मन्त्रालयले जनाएको छ । पछिल्लो २४ घण्टामा थप २३ जनाको कोरोनाबाट मृत्यु भएको छ । यससँगै नेपालमा कोरोनाबाट ज्यान गुमाउनेको संख्या १ हजार ४ सय ३५ पुगेको छ ।
मन्त्रालयको तथ्यांक अनुसार पछिल्लो २४ घण्टामा देशभरका विभिन्न ल्याबमा जम्मा १० हजार ४ सय ६० नमुना परीक्षण भएको छ। यससँगै हालसम्म देशभर १७ लाख १० हजार ४ सय ६० पिसिआर परीक्षण गरिएको पनि मन्त्रालयले जनाएको छ।
