काठमाण्डौं । सत्तारुढ नेपाल कम्युनिष्ट पार्टी (नेकपा) को स्थायी कमिटी बैठक सुरु भएको छ । बैठकमा प्रधानमन्त्री एवं पार्टी अध्यक्ष केपी शर्मा ओली पनि सहभागी भएका छन् ।
बालुवाटारमा दिउँसो १ बजेका लागि बोलाइएको बैठक आन्तरिक विवादका कारण ढिलो गरी सुरु भएको हो । प्रधानमन्त्री ओली बैठकमा नआएपछि ओली र अर्का अध्यक्ष पुष्पकमल दाहाल प्रचण्डबीच दुई पटक बालुवाटारमा भेटवार्ता भएको थियो । पछिल्लो पटक दुई अध्यक्षबीच भएको भेटमा प्रधानमन्त्री ओली बैठकमा सहभागी हुन राजी भएको बताइएको छ ।
पार्टीभित्र र बाहिरबाट आलोचना भएपछि प्रधानमन्त्री केपी शर्मा ओली मंगलबार जारी अध्यादेश फिर्ता लिन सहमत भएका छन् । संवैधानिक परिषद्सम्बन्धी अध्यादेश जारीपछि नेकपा विवाद जटिल मोडमा पुगेका बेला पार्टी नेताहरुसँगको संवादमा ओली अध्यादेश फिर्ताका लागि तयार भएको र उनी बैठकमा सहभागी हुन तयार भएका हुन् ।
स्थायी कमिटी बैठकअगाडि ओली र अर्का अध्यक्ष पुष्पकमल दाहालबीच दुई चरणमा छलफल भएको थियो । त्यही छलफलमा ओलीले अध्यादेश फिर्ता लिने र असन्तुष्ट समूहले विशेष अधिवेशनका लागि निवेदन दर्ता नगराउने सहमत भएका छन ।
