काठमाडौं । नेपालमा कोरोना भाइरसको महामारीविरुद्धको खोप बुधबारदेखि लगाइँदैछ । प्रधानमन्त्री केपी शर्मा ओलीले बुधबार बिहान १० बजे खोप अभियानको शुभारम्भ गर्दैछन् । उनले भर्चुअल माध्यमबाट प्रधानमन्त्रीको सरकारी निवास बालुवाटारबाटै खोपको शुभारम्भ गर्न लागेको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिए ।
उनले पहिलो दिन बुधबार ६० जिल्लाका १२० बढी केन्द्रबाट अग्रपंक्तिमा रहेर भूमिका खेलेकालाई खोप लगाइने बताए । उनले भने, ‘हामीसँग १० लाख डोज खोप छ । ४ लाख ३० हजारदेखि ४ लाख ६० हजार जना सम्मलाई खोप लगाउनु पुग्छ ।’
उनका अनुसार १८ गतेभित्रमा सबै जिल्लामा खोप लगाउन थालिने छ । १० दिनभित्र कोरोना भाइरस विरुद्धको अभियानमा अग्रपंक्तिमा रहेर खटिएका स्वास्थ्यकर्मी, सफाइकर्मी, एम्बुलेन्स चालक लगायतलाई खोप लगाइने बताए ।
यो खोप दुई चरणमा लगाइने छ । २८ दिनको फरकमा दोस्रो डोज खोप लगाइने भए पनि दिनको सजिलोका लागि नेपालमा माघ १४ गते लगाउनेलाई फागुनको १४ गते दोस्रो डोज लगाइने डा। गौतमले बताए । पाखुराको मांसपेशीभित्र खोप लगाइने छ ।
