गजुरी गाउँपालिकाको संक्षिप्त परिचय
संघीय गणतन्त्र नेपालको बागमती प्रदेशमा पर्ने धादिङ जिल्ला नेपालको एकमात्र यस्तो जिल्ला हो जो नेपालको उत्तर हिमालदेखि दक्षिण तराईको भूभागसम्म फैलिएर रहेको छ । नेपालको समग्र भौगोलिक धरातलको विशेष बोकेको धादिङ जिल्लामा सबै किसिमको हावापानी पाइन्छ । यस्तो विशेषतायुक्त जिल्लामा पर्ने गजुरी गाउँपालिका नेपालको प्रसिद्ध नदी त्रिशुलीको किनारदेखि मकवानपुर जिल्लाको सिमानासम्म फैलिएर रहेको छ ।
काठमाडौंलाई तराईसम्म जोड्ने एकमात्र पृथ्वी राजमार्ग यसै गाउँपालिकाबाट भएर जाने भएकोले यसलाई नेपालभरि प्रायः सबैले चिन्दछन् । करिब १३८.६६ वर्ग कि.मि. क्षेत्रफलमा फैलिएको यो गाउँपालिकाको पूर्वमा गल्छी गाउँपालिका, पश्चिमा बेनिघाट रोराङ गाउँपालिका, उत्तरमा त्रिशुली नदीको किनार र दक्षिणमा मकवानपुर जिल्ला पर्दछ ।
यो गाउँपालिका समुद्री सतहबाट करिब ३०० देखि १३०० मिटर सम्मको उचाईसम्म फैलिएर रहेको छ । विश्व मानचित्रमा २८ डिग्री ७३ मिनेट उत्तरी अक्षांश र ८४ डिग्री ९८ मिनेट पूर्वी देशान्तरमा अवस्थित यो गाउँपालिकामा बाहुन, क्षेत्री, तामाङ, चेपाङ, मगर, नेवार लगायतका जातजातिको बसोबास भएकोले यहा“को कला, संस्कृति, रीतिरिवाज र परम्परामा पनि विविधता पाइन्छ । यहाँका जनताको मुख्य पेशा कृषि भए पनि व्यापार, वैदेशिक रोजगार, उद्योग व्यवसाय यहाँका अन्य पेशाहरु हुन् ।
साविकको गजुरी, पिंडा र किरान्चोक गा.वि.स.लाई मिलाएर बनेको यस गाउँपालिका नेपाल सरकारको आदेश अनुसार २०७३ साल फागुन २७ गतेबाट सञ्चालनमा आएको हो । पृथ्वी राजमार्गमा पर्ने मलेखु, गजुरी, घाटबेसी, आदमघाट यहाँका मुख्य बजार क्षेत्र हुन् । भद्रकाली, सिद्धेश्वर, ओडारे महादेवस्थान, पिण्डेश्वरी, ईन्द्रायणी, सानो पशुपतिनाथ आदि यहाँका मुख्य मन्दिरहरु हुन् । माछा पाइने प्रख्यात ठाउँ मलेखु बजार पनि यसै गाउँपालिकामा पर्दछ ।
नेपाली सेनाको गण, आदमघाटमा रहेको सशस्त्र प्रहरी बलको कार्यालय, जिल्ला ट्राफिक कार्यालय र इलाका प्रहरी कार्यालय समेतका सुरक्षा निकायहरु रहेको र आदर्श बहुमुखी क्याम्पस, विभिन्न मा.वि. र आधारभूत विद्यालयहरु गजुरी बजारमा रहेको प्राथमिक स्वास्थ्य केन्द्र लगायत अन्य स्वास्थ्य सँग सम्बन्धित निकायहरु सेक्टर र इलाका वन कार्यालयहरु, कृषि र पशु सेवा केन्द्र, महिला तथा बालबालिका कार्यालय, सीप विकास तालिम केन्द्र, कृषि सामग्री संस्थान, विद्युत प्राधिकरण जस्ता सरकारी र विभिन्न राष्ट्रिय तथा अन्तर्राष्ट्रिय गैर सरकारी निकायहरुको कार्यशीलताले यस गाउँपालिकाको गजुरी बजारलाई दोस्रो जिल्ला सदरमुकामको रुपमा समेत लिने गरिएको छ ।
जम्मा वडा संख्या : ८
जम्मा जनसंख्या : २७०८४ (२०६८ सालका जनगणना अनुसार)
समावेश गाविस : गजुरी, पिडा र किरान्चोक गाविस
जम्मा क्षेत्रफल : १३८.६६ (वर्ग किमी)
यो पनि पढ्नुहोस्..
पालिका परिचय : गल्छी गाउँपालिका, धादिङ
