धादिङ । नेपाल त्रिकोणात्मक टी–ट्वान्टी सिरिजको तेस्रो खेलमा नेदरल्यान्ड्ससँग पराजित भएको छ । टियु क्रिकेट मैदानमा आज भएको खेलमा नेपाल नेदरल्यान्ड्ससँग ३ विकेटले पराजित भएको हो ।
नेपालले दिएको २ सय ७ रनको लक्ष्य नेदरल्यान्ड्सले १९ ओभर ३ बलमा ७ विकेट गुमाएर पूरा गर्यो । यस अघि टस जितेर पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै २ सय ६ रन जोडेको थियो ।
नेदरल्यान्ड्सविरुद्ध नै टी–ट्वान्टी अन्तराष्ट्रियमा डेब्यु गरेका कुशल भुर्तेल लगातार तेस्रो अर्धशतक खेलेका छन् । यस अर्धशतकसँगै उनी टी–ट्वान्टी अन्तराष्ट्रियमा डेब्युसँगै लगातार तीन अर्धशतक बनाउने विश्वका पहिलो खेलाडी बनेका छन् ।
जीतसँगै नेदरल्यान्ड्स दोस्रो स्थानमा रहेको छ । नेपालको भने यो पहिलो हार हो । नेपालले ३ खेलमा ४ अंक जोड्दै शीर्ष स्थानमा रहेको छ । २ खेलमा अंक विहीन मलेसिया पुछारमा रहेको छ । राउण्ड रोबिनको आधारमा जारी सिरिजको शीर्ष दुई टोलीले फाइनल खेल्ने छन् ।
