नेपालका प्रधानमन्त्री शेरबहादुर देउवा र भारतका प्रधानमन्त्री नरेन्द्र मोदीले नयाँ दिल्लीको हैदरावाद हाउसबाट हरियो झन्डा देखाएर उद्घाटन गर्नुभएको रेल जनकपुरधाम आइपुगेको छ ।
भारतको जयनगरबाट जनकपुरधाम आइपुग्न रेललाई दुई घण्टा लाग्यो । हरेक स्टेसनमा भव्य रुपमा स्थानीयवासीले नेपाल–भारतको झन्डासहित ताली बजाएर स्वागत गरेका थिए ।
शनिवार दिउँसो करिब १ बजे भारतको जयनगरबाट गुडेको रेल दिउँसो ३ बजे जनकपुरधाम आइपुगेको हो । रेललाई नयाँ बेहुली झैँ सिँगारिएको छ । रेल हेर्नका लागि बिहानैदेखि हजारौँको सङ्ख्यामा स्थानीयहरू रेल्वे स्टेसनमा पुगेका थिए । अब आइतबारदेखि दिनहुँ दुई पटक रेल सञ्चालन हुने छ ।
