धादिङ । मंसिर ४ गते हुने प्रदेश तथा प्रतिनिधिसभा निर्वाचनका लागि धादिङका राजनीतिक दल र उम्मेदवारहरुले खुल्ला प्रचार थालेका छन् ।
धादिङ प्रतिनिधिसभा क्षेत्र नम्बर १ मा नेकपा एमालेका भुमी त्रिपाठीले पनि विहिबारबाट थाक्रे गाउँपालिकाबाट औपचारिक प्रचार थालेका छन् । प्रदेशसभा ‘१’का प्रतिष्पर्धी एमालेका रमेश आचार्य र ‘२’ का गजेन्द्र थपलियाले पनि विहिबारबाट प्रचार तिव्र पारेका छन् ।
सत्तागठबन्धन र नेकपा एमाले दुबै पक्षले आजबाट औपचारिक रुपमा प्रचार थालेका छन् । यस क्षेत्रमा सत्ता गठबन्धनका साझा उम्मेदवार नेकपा एकिकृत समाजवादीका उपाध्यक्ष एवं बागमती प्रदेश सरकारका मुख्य मन्त्री राजेन्द्र प्रसाद पाण्डे रहेका छन् ।
संघीय उम्मेदवार पाण्डेसँग प्रदेशसभा ‘१’ मा गठबन्धनका साझा उम्मेदवार नेपाली कांग्रेसका मधुकुमार श्रेष्ठ र प्रदेशसभा ‘२’ का साझा उम्मेदवार नेकपा माओवादी केन्द्रका नेता एवं बागमती प्रदेश सरकारका मन्त्री शालिकराम जम्कट्टेल पनि घरदैलोमा निस्किएका छन् । उम्मेदवारहरुलाई मतदाताले ठाउँठाउँमा स्वागत गरेका छन् ।
