वीरगञ्ज । पर्सा क्षेत्र नम्बर २ को प्रतिनिधीसभा सदस्यमा पाँच दलीय सत्ता गठबन्धनका साझा उम्मेदवार अजय चौरसियाले कम्युनिष्ट शासन भएको देशको इशारामा जसपाले मधेस विरोधी एमालेसंग अपबित्र गठबन्धन गरेको बताएका छन् ।
वीरगन्ज महानगरपालिका वडा नम्बर १७ अलौंमा बिहीबार राति आयोजित चुनावीसभालाई सम्बोधन गर्दै काँग्रेस उम्मेदवार चौरसियाले भने ,‘ उत्तरको छिमेकी राष्ट्रको इशारामा जसपा सत्ता गठबन्धन छाडेर अचानक मधेस विरोधी एमालेसंग मिल्यो , जुन देशमा कम्युनिष्ट शासन छ , जहा जनताले भोट दिन पनि पाउदैनन् ।
उनले जसपाले जिते केन्द्रमा केपी ओलीलाई समर्थन गर्ने र एमाले सरकारले फेरि मधेसीलाई अधिकारबाट बन्चित गराउने बताए ।
मधेसका अधिकारका लागि सधै वकालत गर्ने पार्टी काँग्रेस , लोसपा , माओवादी र नेकपा एस रहेको जिकिर उनले गरे । तर यदि जसपा जित्यो भने केन्द्रमा ओलीलाई समर्थन गरेर सरकार बनाउछ , जुन ओली सरकारले न कहिल्यै मधेसलाइ अधिकार दियो न दिनेछ , उनले भने । त्यसका कारण पाँच दलीय गठबन्धनलाइ मत दिएर जिताउन उनले आग्रह गरे ।
उनले आफुले चुनाव जिते पर्सा क्षेत्र नम्बर २ मा सुविधा सम्पन्न बृद्धाश्रम बनाउने वाचा गरे । यसका साथै एउटा प्राविधिक क्याम्पस स्थापना गर्छु , जुन क्याम्पसमा यस क्षेत्रका युवा , युवतीहरुले प्राविधीक अध्ययन गरेर र तालिम लिएर रोजगारी गर्ने छन् , उनले भने ।
उनले मधेस र देशभर अहिले पाँच दलीय गठबन्धनकै लहर रहेको जिकिर पनि गरे । उनले भने ,‘ अबको चुनावबाट मधेसमा पनि पाँच दलीय गठबन्धनकै सरकार बन्छ , केन्द्रमा पनि यहि गठबन्धनको सरकार बन्छ , दुवै सरकारले मधेस र देशलाई समृद्ध बनाउछ ।
चुनावीसभालाई गठबन्धनबाट लोसपाका प्रदेशसभासदस्य उम्मेदवार रमेश कुर्मी, मधेस प्रदेशका पूर्वमन्त्री ओम प्रकाश शर्मा , पर्सागढी नगरपालिकाका पूर्व मेयर लोकनारायण यादव लगायतले पनि सम्बोधन गरेका थिए ।
