नुवाकोटको बेलकोटगढीमा जारी निशुल्क स्वास्थ्य शिविरमा शनिबार दोस्रो दिन ५४० जनाले स्वास्थ्य परिक्षण तथा उपचार गराएका छन् । पाथीभरा महिला साना किसान कृषि सहकारी सँस्था धमलेको पहल र कादुरी एग्रिकल्चर एण्ड एशोसियसन ब्रिटिश गोर्खाज नेपाल पोखराको आयोजनामा भएको निशुल्क स्वास्थ्य शिविरमा २०१ जना पुरुष र ३३९ जना महिलाले स्वास्थ्य परिक्षण तथा उपचार गराएको सहकारीका अध्यक्ष शान्ता खतिवडा तिवारीले बताईन् । यसअघि शुक्रबार ३१२ जनाले स्वास्थ्य जाँच तथा उपचार गराएका थिए ।
निशुल्क स्वास्थ्य परिक्षण अन्तर्गत ओपिडि परिक्षण ४६४ जनाले गराएका छन् भने स्त्री तथा प्रसुती अन्तर्गत १२५ जना र ३४१ जनाले आँखा जाँच गराएका छन् । आँखाका बिरामी मध्ये १४ जनाको मोतिबिन्दुको अप्रेसन पनि गरिएको सहकारीका प्रवन्धक राजकुमार तामाङले बताए । निशुल्क स्वास्थ्य शिविर भोलि फागुन १ गते सम्म सञ्चालन हुनेछ ।
गाउँमा निशुल्क स्वास्थ्य परिक्षणको आयोजना हुँदा सेवाग्राही तथा स्थानिय खुसी छन् भने सेवा गर्न पाउँदा आयोजक पनि खुसी देखिएका छन् ।
