राष्ट्रिय बाल दिवसको अवसर पारेर रसुवामा जिल्ला स्तरीय वक्तृत्वकला प्रतियोगिता गरिएको छ । कालिका गाउँपालिका सँगको साझेदारीमा रेडियो लाङटाङले प्रतियोगिताको आयोजना गरेको हो ।
"मैले पढ्ने शिक्षा कस्तो हुनुपर्छ" भन्ने विषयमा आयोजित प्रतियोगितामा कालिका गाउँपालिका वडा नम्बर २ मा रहेको कालिका हिमालय माध्यमिक विद्यालयका अर्पना पौडेल प्रथम भएकी छिन् ।
यस्तै कालिका ५ मा रहेको निलकण्ठ नमुना माध्यमिक विद्यालयका छेवाङ लामा द्धितिय र उत्तरगया ४ मा रहेको नव विजयी महेन्द्र माध्यमिक विद्यालयका रोजिना न्यौपाने तृतिय भएका छन् । प्रथम, द्धितिय र तृतिय हुने विद्यार्थीलाई रेडियो लाङटाङले क्रमश ५ हजार, ३ हजार र २ हजार नगद सहित प्रमाणपत्र प्रदान गरेको रेडियो लाङटाङका सचिव गीता न्यौपानेले बताईन् ।
कालिका हिमालय माध्यमिक विद्यालयको प्राङ्गणमा भएको कार्यक्रममा रसुवा जिल्ला भित्रका विभिन्न १० विद्यालयहरुको सहभागिता रहेको थियो । कार्यक्रमको सञ्चालन तथा सहजिकरण पत्रकार आशिष ठकुरीले गरेका थिए ।
