धादिङ (धार्के) । धादिङको धार्केमा एभरेष्ट बैंकको नयाँ शाखा सोमबारबाट सञ्चालनमा आएको छ । धार्के शाखाको धुनिबेशी नगरपालिकाका मेयर बालकृष्ण आचार्यले उद्घाटन गर्नु भए सँगै सञ्चालनमा आएको हो । बैंकको १ सय १ औँ शाखाको रुपमा धार्केमा सेवा विस्तार गरिएको बैँकले जनाएको छ ।
कार्यक्रमका प्रमुख अतिथि तथा धुनिबेशी नगरपालिकाका मेयर बालकृष्ण आचार्यले धार्केमा बैँकले सेवा विस्तार गरेकोमा खुसी व्यक्त गर्दै नगरपालिकाकले पनि बैँक सँग सहकार्य गरेर अघि बढ्ने बताउनुभएको छ । यसैगरी उहाँले किसानलाई ऋण लगानी गर्दा नागरिक लाई दुःख नदिन पनि बैंकलाई आग्रह गर्दै सम्बन्धित किसान सम्म नै पुगेर सहुलियत दरमा ऋण प्रवाह गर्न आग्रह गर्नु भयो ।
कार्यक्रममा बोल्नु हुँदै धादिङ उद्योग वाणिज्य संघका अध्यक्ष रुद्र बहादुर खत्रीले कृषकहरुलाई कम लोनमा कर्जा प्रवाह गर्न बैंकलाई आग्रह गर्दै बैंक सग मिलेर काम गर्ने बताएका छन ।
यसैबिच एभरेष्ट बैंकका प्रमुख डा.सन्दिप कुमार श्रीवास्तवले धार्के शाखाद्धारा सबै नागरिकलाई सबै किसिमका बैँकिङ सेवा प्रदान गर्ने बताउनुहुँदै किसानलाई सहुलियत दरमा ऋण प्रवाह गर्ने बताउनुभएको छ ।
एभरेष्ट बैंकको मुलुकभर १ सय १ शाखामा ११ लाख भन्दा बढि ग्राहकहरु रहेका छन् भने भारतको पंजाब नेशनल बैंकसंगको मजबुत र अन्तराष्ट्रिय साझेदारी समेत रहेको छ ।
