रसुवा (खाल्टे) । उत्तरगया गाउँपालिकाले सार्वजनिक सुनुवाई कार्यक्रम सम्पन्न गरेको छ । गाउँपालिका अध्यक्ष उपेन्द्र लम्सालको अध्यक्षतामा गाउँपालिकाद्धारा चालु आर्थिक वर्ष २०७७/०७८ यो अवधीमा सञ्चालित योजना तथा सार्वजनिक सेवा प्रवाहको प्रभावकारिता विषयमा सुनुवाई सम्पन्न भएको हो ।
कार्यक्रममा विभिन्न वडाका वडा अध्यक्षहरुले वडामा चालु अवस्थामा रहेका योजनाहरु, सम्पन्न भएका योजनाहरु लगायतका विषयमा सहभागीहरुलाई जानकारी गराउनुभएको थियो । सार्वजनिक सुनुवाई कार्यक्रममा वडा नम्बर १ का वडा अध्यक्ष बम बहादुर तामाङ, वडा नम्बर २ का वडा अध्यक्ष खुवा बहादुर तामाङ, वडा नम्बर ३ का वडा अध्यक्ष लाल बहादुर तामाङ, वडा नम्बर ४ का वडा अध्यक्ष केशर बहादुर वुलुन र वडा नम्बर ५ का वडा अध्यक्ष इश्वर बहादुर थापाले वडाका विभिन्न विषयमा सहभागीहरुलाई जानकारी गराउनुभएको हो ।
यस्तै गाउँपालिकाका प्रमुख प्रशासकिय अधिकृत अर्जुन खड्काले चालु आर्थिक वर्षमा भए गरेका कामहरुको बारेमा प्रगती प्रतिवेदन प्रस्तुत गर्नुभएको थियो ।
वडा अध्यक्षहरु र प्रमुख प्रशासकिय अधिकृतहरुको प्रस्तुती पछि सहभागीहरुले गाउँपालिका अध्यक्ष उपेन्द्र लम्साल, उपाध्यक्ष चमेली गुरुङ लगायतलाई गाउँपालिकाको सेवा प्रवाह सँगै विकास निर्माणका प्राथमिकता, खानेपानीको समस्या लगायतको विषयमा प्रश्न वा गुनासो राखेका थिए । सहभागीको प्रश्नको जवाफ सम्बन्धित सरोकारवाला व्यक्तिले दिनुभएको छ ।
कार्यक्रममा विभिन्न राजनैतिक दलका प्रतिनिधी सहितका व्यक्तिहरुको समेत सहभागिता रहेको थियो । स्याउबारीमा रहेको रेडियो लाङटाङ ९०.३ मेगाहर्जको सहजिकरण, रेडियो लाङटाङका स्टेशन म्यानेजर गिता न्यौपाने, नुवाकोट एफएमका स्टेशन म्यानेजर श्रीराम अधिकारी लगायतको सक्रियता रहेको कार्यक्रममा पत्रकार आशिष ठकुरीले कार्यक्रम सञ्चालन गरेका थिए ।
सभ्य सम्वृद्ध उत्तरगया हाम्रो शान, कृषी जलस्रोत पर्यटन विकासको अभियान भन्ने नारा सहित गाउँपाािलकाले विभिन्न वडा तथा पालिका गौरवको आयोजनाहरुलाई प्राथमिकताका साथ कार्यान्वयन गरिरहेको कार्यक्रममा जनाईएको छ ।
