गएको भदौ २३ र २४ गतेको ‘जेनजी’ प्रदर्शनका क्रममा काठमाडौंको चुच्चेपाटी पुगेका हुम्लाका थुक्तेन पाल्वर लामा दुई महिनादेखि बेपत्ता छन् । हुम्लाको नाम्खा गाउँपालिका–३, खगालगाउँका थुक्तेन जेनजी प्रदर्शनका क्रममा भदौ २३ गते नयाँ बानेश्वर र २४ मा चुच्चेपाटीस्थित भाटभटेनी क्षेत्रमा पुगेका थिए । तीनचुलीमा बस्दै आएका थुक्तेनको हालसम्म कुनै अत्तोपत्तो नभएको उनका दाइ ङयुर तामाङले बताए ।
थुक्तेन नारायणथान गुम्बामा लामा ज्ञानको अध्ययन सकाएर भतिजासँगै बस्दै आएका थिए । थुक्तेन हराएपछि उनको परिवारले जिल्ला प्रहरी कार्यालय हुम्ला र प्रहरी वृत्त गौशालामा खोजीका निम्ति निवेदन दिएको थियो ।
सँगै गएका साथीहरूले थुक्तेन भाटभटेनी क्षेत्रमा हराएको भन्दै परिवारलाई खबर पुर्याएका थिए । प्रदर्शनकारीले भाटभटेनीमा आगजनी गरेका थिए । त्यहाँ सरसफाइ गर्ने क्रममा चार दिनपछि सातजनाको शव जलेको अवस्थामा फेला परेको थियो ।
सातै शव महाराजगन्जस्थित त्रिवि शिक्षण अस्पतालको फरेन्सिक विभागमा पोका पारेर राखिएको छ । ती शवको डीएनए परीक्षण गर्न नमिल्ने निष्कर्ष निकालिएको छ ।
