धादिङ । धादिङको धुनीबेंशीमा ६५ हजार अमेरिकी डलर सटही गरिदिने प्रलोभन देखाएर एक वृद्ध व्यवसायीबाट ११ लाख ७५ हजार रुपैयाँ नगद र सुनका गहना ठगी गर्ने आरोपमा एक जना पक्राउ परेका छन्।
जिल्ला प्रहरी कार्यालय धादिङका अनुसार पक्राउ पर्नेमा सिन्धुपाल्चोकको बाह्रबिसे नगरपालिका–३ घर भई हाल काठमाडौंको गोकर्णेश्वर बस्ने ३७ वर्षीय बुद्धिबहादुर योञ्जन रहेका छन्। उनलाई धुनीबेंशी–९ झ्याप्लेखोला क्षेत्रबाट पक्राउ गरिएको हो।
प्रहरीका अनुसार पोखराका ६९ वर्षीय सुनचाँदी व्यवसायी थमानसिंह विश्वकर्मालाई डलर सटही गर्दा ठूलो फाइदा हुने भन्दै बोलाएर नगद ११ लाख ७५ हजार रुपैयाँ र सुनका गहना लिई डलरको सट्टा खाली कागजको बन्डल थमाइएको थियो।
घटनामा संलग्न अन्य व्यक्तिको खोजी भइरहेको प्रहरीले जनाएको छ। पक्राउ परेका योञ्जनविरुद्ध ठगी मुद्दामा थप अनुसन्धान भइरहेको छ।
