काठमाडौँ र ललितपुरका दुई छुट्टाछुट्टै स्थानमा रहेका डेराबाट करिब तीन लाख रुपैयाँ बराबरको धनमाल चोरी भएको छ। बिहीबार दिउँसो काठमाडौँको बुढानिलकण्ठ नगरपालिका–८ गल्फुटारस्थित सुमिना कार्कीको कोठाबाट सुनका गरगहना र नगदसहित करिब १ लाख ९५ हजार रुपैयाँ बराबरको धनमाल चोरी भएको हो।
झापा कमल गाउँपालिका–८ घर भई हाल गल्फुटारमा डेरा गरी बस्ने कार्कीको कोठामा कोही नभएको मौका छोपी चोरी भएको प्रहरीले जनाएको छ।
त्यसैगरी ललितपुर महानगरपालिका–९ भोल ढोकास्थित अर्को एक डेराबाट पनि चोरी भएको छ। महाङ्काल गाउँपालिका–२ घर भई हाल भोल ढोकामा बस्ने सुमिना तामाङको कोठाबाट सुनको सिक्री र नगद गरी १ लाख ४ हजार ६ सय रुपैयाँ बराबरको धनमाल चोरी भएको छ। तामाङको कोठामा बिहीबार बिहानै चोरी भएको जानकारी प्राप्त भएको छ।
