नेपाल प्रहरीले नागढुंगाबाट चाँदीसहित एकजनालाई पक्राउ गरेको छ । पक्राउ पर्नेमा वीरगञ्ज महानगरपालिका–१६ का २५ वर्षीय किसन साह छन् ।
प्रहरी प्रभाग नागढुंगाको टोलीले वीरगञ्जबाट काठमाडौं आउँदै गरेको मप्र ०१–००१ ख ७७२१ नं को यात्रुबाहक बस चेकजाँचका क्रममा दुई दशमलव पाँच किलो चाँदीसहित उनलाई मंगलबार पक्राउ गरेको हो ।
जिल्ला प्रहरी परिसर काठमाडौंका प्रवक्ता, प्रहरी उपरीक्षक पवनकुमार भट्टराईले बसमा लुकाएर ल्याएको अवस्थामा चाँदीसहित साहलाई पक्राउ गरिएको जानकारी दिए । उक्त चाँदीको मूल्य १६ लाख ९० हजार रुपैयाँबराबर रहेको छ ।
पक्राउ परेका साहलाई आवश्यक अनुसन्धानका लागि प्रहरी वृत्त थानकोट पठाइएको परिसरले जनाएको छ ।
