धादिङ प्रहरीले अवैध सिसौ जातको काठ ओसारपसारमा संलग्न दुई जनालाई नियन्त्रणमा लिएको छ।
प्रहरीका अनुसार जेठ १५ गते साँझ करिब ५ बजे त्रिपुरासुन्दरी गाउँपालिका–७, खहरेबाट धादिङबेसीतर्फ अवैध सिसौको गोलिया काठ बोकेको मिनी ट्रक आउँदै गरेको भन्ने गोप्य सूचनाका आधारमा जिल्ला प्रहरी कार्यालय धादिङबाट खटिएको टोलीले नीलकण्ठ नगरपालिका–३, पुछारबजारमा सवारी जाँच गरेको थियो।
जाँचका क्रममा सल्यानटारबाट धादिङबेसीतर्फ आउँदै गरेको बा ५ ख ६१९३ नम्बरको मिनी ट्रकमा लोड गरिएको सिसौ जातको गोलिया काठ बरामद गरिएको प्रहरीले जनाएको छ। नापजाँच गर्दा उक्त काठ १०४ दशमलव ३७ क्युबिक फिट रहेको पाइएको थियो।
घटनामा संलग्न रहेको आरोपमा ट्रक चालक नीलकण्ठ नगरपालिका–९ निवासी ४२ वर्षीय नवराज श्रेष्ठ र नीलकण्ठ नगरपालिका–६ स्थायी घर भई हाल वडा नम्बर ३ मा बसोबास गर्दै आएका ६५ वर्षीय गणेशकुमार श्रेष्ठलाई नियन्त्रणमा लिइएको छ।
बरामद काठ तथा पक्राउ परेका दुवै जनालाई आवश्यक अनुसन्धान तथा कारबाहीका लागि जेठ १७ गते डिभिजन वन कार्यालय, धादिङबेसीमा बुझाइएको प्रहरीले जनाएको छ।
