काठमाण्डौँ । कुमारी बैंकले प्रर्वद्धन गरेको कुमारी ईक्विटी फण्डका इकाईहरु फागुन १४ गतेदेखि सर्वसाधारणका लागि बिक्री खुल्ला हुने भएको छ । कुमारी क्यापिटलको व्यवस्थापनमा १० वर्षे बन्दमुखी योजनाको ८० करोड रुपैंया बराबरको ८ करोड ईकाई मध्ये १५ प्रतिशत अर्थात १ करोड २० लाख ईकाई कुमारी बैंकलाई सुरक्षित गरी बाँकी ईकाईहरु सर्वसाधारणमा निष्काशन हुन लागेको हो । प्रतिईकाई १० रुपैंयाको अंकित मूल्यमा सर्वसाधारणमा बिक्री गर्न लागिएको हो ।
राजधानीमा एक कार्यक्रमको आयोजना गरी कुमारी क्यापिटलले इकाईका लगानीकर्तालाई आकर्षक प्रतिफल बितरण गर्ने योजना अन्तरगत फण्ड सञ्चालन गर्न लागिएको जनाएको छ । १० वर्ष अवधिको फण्ड सुपरिवेक्षणका लागि ५ जनाको टीम तयार पारिएको क्यापिटलले जनाएको छ ।
ईकाई बिक्रीबाट संकलन हुने रकम दक्षतापुर्वक तोकिएका क्षेत्रहरुमा लगानी गर्दै उच्चतम प्रतिफलको आधार तयार पारिने क्यापिटलले जनाएको छ । यस क्रममा सम्भावित जोखिमको उच्च मुल्याङ्कन गर्दै लगानीकर्ताको प्रतिफल क्षमतालाई बढाउँदै लैजाने बताइएको छ ।
पहिलो वर्ष १० रुपैंयाको दरमा सुरु हुने एसेट भ्यालु अन्तिम वर्षमा २२ रुपैंया ४९ पैसा पुग्ने प्रक्षेपण गरिएको छ भने लाभांश र पूँजीवृद्धि समेत गरी औषत प्रतिफल २२ प्रतिशत कायम हुने अनुमान गरिएको छ ।
फागुन १४ गतेदेखि निष्काशन हुने ईकाईमा लगानी गर्नका लागि मेरो शेयर अनलाइन सफ्टवेयरका साथै आस्वा सदस्य बैंक वित्तीय संस्थाबाट आइपिओ जसरी नै ईकाईमा आवेदन गर्न सकिन्छ । कम्तीमा १०० ईकाईदेखि अधिकतममा निष्काशन भएको सबै इकाईका लागि आवेदन दिन सकिनेछ ।
