धादिङ । धादिङको धुनिवेशी नगरपालिकामा दैनिक ३२ हजार २ सय ४० खुकुरा वध गर्ने क्षमताको स्वचालित वधशाला सञ्चालनको तयारी भइरहेको छ । नुवाकोटका केशवराज थापाले सञ्चालनमा ल्याउन लागेको केबी एग्रो एन्ड रिसर्च प्रा.लि सञ्चालनको अन्तिम तयारीमा रहेको हो ।

धुनिवेशी नगरपालिका वडा नं. ८ बाहुनडाँडामा ब्रोइलर कुखुरा वधशाला सञ्चालन गर्न ६५ करोड रुपैयाँ लाग्ने भएको छ । वधशालामा ३ सय मानिसले रोजगारी पाउनेछन् । वधशालामा प्राविधिक कर्मचारी १० प्रतिशत र ९० प्रतिशत अप्राविधिक कर्मचारी प्रतिशत हुनेछन् । प्रतिघण्टा २ हजार ३० कुखुरा वध गर्ने र एक दिनमा दुई सिफ्टमा चल्ने भएकाले दैनिक ३२ हजार ४ सय ८० कुखुरा वध गर्न सकिन्छ ।

खेर जाने हड्डी, रगतबाट कुखुराको दानामा प्रयोग हुने प्रोटिन बनाइने, उद्योगमा प्रयोग भएको पानीलाई शुद्धीकरण गरी बगाइने एवं वधशालामा युरो मापदण्ड लागू गरिने पनि सञ्चालक थापाले बताए । उद्योगमा प्रयोग भएका मेसिनहरू टर्की, जर्मनी, इटाली, हल्यान्ड र पोल्यान्डबाट ल्याएको उनले बताए । मेसिन जडान गर्न पनि सोही देशबाट प्राविधिक आएका छन् । यस किसिमको वधशाला नेपालमा पहिलो भएको दाबी थापाले गरे ।

वधशालामा जिउँदो २० हजार कुखुरा भण्डारण गर्ने क्षमता रहेको छ । तयारी सामान ५ लाख केजी भण्डारण गर्न सकिन्छ । अहिले किसानले विभिन्न कोल्ड स्टोरमा लगेर बेच्दै आएका छन् । यो उद्योग सञ्चालनमा आएपछि दैनिक १६ हजार २ सय ४० का हिसाबले ६० लाख खुकुरा वधशालाका लागि आवश्यक हुनेछ । ६० लाख कुखुरा पालन गर्नका लागि दुई–चार जना किसान वा फर्मले सम्भव देखिँदैन ।

६० लाख कुखुरा धादिङमा मात्र उत्पादन हुने सम्भावना नभएपछि नुवाकोट, काठमाडौं, सिन्धुपाल्चोक, काभ्रे पलान्चोक, गोरखा, चितवनबाट ल्याइने सञ्चालक थापाले बताए । उद्योगमा प्रत्यक्ष रूपमा ३ सय जनाले रोजगारी पाए पनि अप्रत्यक्ष रूपमा २० हजार किसानले रोजगारी पाउने अनुमान गरिएको छ ।

वधशालामा उत्पादन भएका मासुका परिकार गुणस्तरीय हुनेमा उनले जोड दिए । यहाँ ल्याइएका कुखुराको स्वास्थ्य परीक्षण गरिन्छ । स्वस्थकर कुखुराहरू मात्र वध गर्न सिफारिस हुने पनि थापाले बताए । कुखुराको स्वास्थ्य परीक्षणपछि गाडीसहित तौल गरिने र वध गरिएको मासु काठमाडौं र आसपासका सहरी क्षेत्रमा पठाउनेतर्फ काम गरिरहेको थापाले बताए ।