प्राइम कमर्सियल बैंक लिमिटेडले ऋणपत्र निष्काशन प्रयोजनार्थ सानिमा क्यापिटल लिमिटेडलाई निष्काशन तथा बिक्री प्रबन्धक साथै डिबेञ्चर ट्रष्टी नियुक्त गरेको छ।
बैंकले १० वर्ष अवधिको वार्षिक ८ प्रतिशत ब्याजदर भएको ‘८५ प्राइम डिबेञ्चर २०९१’ ऋणपत्र निष्काशन गर्न लागेको हो। बैंकले प्रति ऋणपत्र १ हजार रुपैयाँ अंकित मूल्यका ३ अर्ब रुपैयाँ बराबरको ३०,००,००० कित्ता ऋणपत्र निष्काशन गर्नेछ। सो मध्ये ६० प्रतिशत अर्थात १ अर्ब ८० करोड रुपैयाँ बराबरको १८ लाख कित्ता व्यक्तिगत तवरबाट बिक्री गरिनेछ भने ४० प्रतिशत अर्थात १ अर्ब २० करोड रुपैयाँ बराबरको १२,००,००० कित्ता सर्वसाधारणमा सार्वजनिक निष्काशन गर्नेछ।
सर्वसाधारणलाई निष्काशन गरिने ऋणपत्रमध्ये ५ प्रतिशत अर्थात ६०,००० कित्ता ऋणपत्र सामूहिक लगानी कोषका लागि सुरक्षित गरिनेछ। उक्त क्रममा प्राइम कमर्सियल बैंक लिमिटेडका तर्फबाट प्रमुख कार्यकारी अधिकृत सञ्जिव मानन्धरले र सानिमा क्यापिटल लिमिटेडका तर्फबाट प्रमुख कार्यकारी अधिकृत भिष्म राज चालिसेले सम्झौता पत्रमा हस्ताक्षर गरेका छन् ।
