काठमाण्डौं । भारतमा बन्द अवस्थामा रहेको मल, होटल, रेष्टुरा र धार्मिकस्थल आज सोमवारबाट खुलेका छन् । कोरोना भाइरसको संक्रमण रोकथाम तथा नियन्त्रणका लागि लागू गरिएको लकडाउनबाट अर्थतन्त्र मात्र नभइ सामाजिक तथा सांस्कृतिक असरलाई न्युनीकरणका लागि त्यहाँको सरकारले लकडाउन खोल्ने दिशा निर्देशको अनलक–१ प्रावधानअनुसार होटल, मल, रेष्टुरा र धार्मिकस्थल खुला गरिएको हो ।
र यहीबीचमा भावी दिनमा सार्वजनिक स्थलहरु खुला गरिएपछि पर्ने असर तथा प्रभावका बारेमा चर्चा परिचर्चा पनि शुरु भएको छ ।
प्रधानमन्त्री नरेन्द्र मोदीको सरकारले महामारीका कारण चौपट बनेको अर्थव्यवस्थालाई गतिदिन मल, होटेल, रेष्टुरार धार्मिकस्थल खुला गरेको हो । यसबाट लाखौं मानिस पूर्ववत काममा फर्किने अपेक्षा गरिएको छ । तर सार्वजनिक स्थलहरु खुला गरिएसँगै त्यहाँको स्वास्थ्य मन्त्रालयले केही नियमहरु जारी गरेको छ ।नयाँ नियम अनुसार ती सार्वजनिक स्थानमा ६ फिटको दूरी कायम गर्नुपर्ने छ भने मास्क र सेनिटाइजरको प्रयोगलाई अनिवार्य गरिएको छ । यी स्थानमा प्रवेश गर्नुअघि थर्मल स्क्रिनिङ गर्नुपर्नेछ ।
भारतमा हालसम्म ७ हजार १३५ जनाको कोरोना संक्रमणका कारण मृत्यु भएको छ भने २ लाख ५६ हजार ६११ जना संक्रमित रहेका छन् । त्यहाँको सरकारले गत जुन १ मा लकडाउन ५ को शुरुवात गरेको थियो । जसअन्तर्गत सोमवारबाट अनलक १ को दोश्रो चरणको शुरुवात भएको हो । एजेन्सीको सहयोगमा
